33- GRANDE e LAGO (3ª exp.)

.

MilRios_GrandedePortoII

.

 

Data                                 18/ V / 20 14

Tempo                            Soleado

Distancia                        11,77 millas

Duración                        6h. 43m.

Velocidade media       1,73 nós.

velocidade máxima    4,2 nós.

 

Saímos do porto de Muxía, non hai brisa pero si un certo movemento no mar. Esta ría é moito máis batida que a de Corcubión que navegamos onte.

Arrumbamos cara a punta do Corpiño de Chorente, deixando por estribor as praias da Cruz e de Espiñeirido, familiares para nós pola saída frustrada da expedición do ano pasado.

Ao pasar a punta, seguimos  costeando. Unha vez rebasada a furna do Barro, e dado que disminuiron as ondas, cruzamos a enseada de Merexo, deixando por estribor a praia de Muiños e a piscifactoría. Na punta Sartaña, arrumbamos ao faro do Lago. Este areal acostuma a ser complicado para a piragua. Hai dous anos, desviramos aquí. Nesta ocasión as ondas entran por proa, non temos problema, imos máis a modo, pero máis estabeis.

Tras superar a praia de Leis, entramos na ría do Porto, a marea está baixa e aínda segue devalando. Vogamos pola ribeira de estribor, con corrente, marea e vento en contra. A falta de calado obríganos  a virar a babor, mais a pesar diso quedamos varados. Baixamos da piragua e percibimos que a canle de entrada está na outra ribeira, arrastramos a piragua cara ela e embarcamos de novo, agora si hai calado. As augas están transparentes, mais como vai fresco non apetece probalas.

Pasamos diante do muíño de mareas de Cereixo, pero é imposíbel entrar nel pola marea. Seguimos, e cando chegamos á Ponte, a profundidade disminue considerabelmente, a corrente tira máis, e non hai calado para seguir. Debemos dar volta e aos poucos metros desembarcamos na rampla máis próxima, sen ter chegado á ponte.

É festa, a xente está ataviada para ocasión, e desentoamos coa nosa vestimenta. Sentamosnunha terraza para reparar forzas, e dannos de tapa unha sardiña cocida ás brasas. Despois de comprar o tradicional xelado, neste caso nunha  carnicería, decidimos dar unha volta polo lugar, para darlle tempo á marea. Fronte a igrexa atopámonos cunha réplica en cemento da fonte dos leóns da Alhambra, mais antes de saír do asombro descubrimos que o céspede das árbores que a rodean é de plástico, sobre el uns croios para que o vento non o leve.

Iniciamos o retorno, tamén coa marea en contra, e ao chegar ao muíño, no que aínda non se pode entrar, decatámonos de que a un dos tripulantes lle quedou, ao pór o chaleque, a pucha na rampla. Volvemos recollela, e cando regresamos, xa se pode pasar ao outro lado do muíño. Que rápido sobe marea. Unha vez noutro lado é imposíbel seguir, a diferencia do ocorrido na primeiraexpedición.

Agora  podemos bordear a illa Forno do Sapo pola beira norte, seguimos adiante e navegamos por riba dosmuros das parcelas de marisco, que agora xa non descubren.

Na boca do río a auga móvese, pensamos que unha vez que a deixemos atrás calmará, mais non é así, e a medida que nos aproximamos ao faro, van aumentando os tombos que recibimos por popa.  A pesar do que poidan pensar os profanos, é a navegación máis perigosa, cada onda cámbianos o rumbo  provocando inestabilidade, debemos permanecer moi atentos para endereitalo inmediatamente e que non nos poña de lado. Pasamos a praia con moita cautela, vogando forte e no extremo embarrancamos, coa maior velocidade que podemos, para evitar que nos desvire. Un baño non sería agradábel.

Entramos no río do Lago, que a pesar de ser estreito, permítenos navegar media milla, asárbores que o cruzan obrígannos a desembarcar, unha vez na subida, e a ter que realizar forzados escorzos para pasar. De volta na praia, decidimos dar por rematada a expedición. De seguir a Muxía recibiríamos as ondas de lado e non merece a pena.

Advertisements

Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair /  Cambiar )

Google+ photo

Estás a comentar desde a túa conta de Google+. Sair /  Cambiar )

Twitter picture

Estás a comentar desde a túa conta de Twitter. Sair /  Cambiar )

Facebook photo

Estás a comentar desde a túa conta de Facebook. Sair /  Cambiar )

Conectando a %s