30- MIÑO

.

MilRios_Miño

 BITÁCORA

Data                                    13 / XII / 2013

Tempo                               Nubrado e chuvia

Distancia percorrida       24,43 millas  

Duración                         7h. 52m.

Velocidade media            3,1 nós

Velocidade máxima         5,7 nós ou 12,4

Saímos da Praia dos Muiños da Guarda, en fronte de Camiña. No horizonte, presidindo a desembocadura do Miño, a insua de Santo Isidro, co faro no Forte da Insua. O río está plano, mais aquí hai algunhas ondas que nos esixen ter coidado. A marea sube e contrarresta a forza do río. A luz é especialmente boa e dálle certa maxia á paisaxe. O vento pega de cara, está fresco e ponnos máis activos. Deseguida pasamos por Camposancos, onde se encontra o colexio dos xesuítas que, despois do 36, o novo goberno converteu en campo de concentración.

A babor, moi pegadas a terra, as illas da Xunqueira e as Morraceiras. Pouco despois, deixamos por estribor a Ilha da Bodega, poboada de árbores. Desapareceu a remuiñada que había na desembocadura, a auga está tan escura que parece un espello.

O Miño é totalmente diferente a todos os ríos que levamos navegado, non estamos afeitos a un leito tan ancho, sentímonos coma se estivésemos a navegar no río dunha película.

Deixamos Goián por babor e Vilanova da Cerdeira por estribor. Cando levamos sete millas, atopámonos coa ponte da autoestrada, que non é nada fea. Deixamos a babor unha illa alongada, poboada de árbores, que incita a baixar. Non o facemos porque o percorrido que nos queda e longo e a estas alturas do ano os días deveceron. Cando levamos navegadas catorce millas, chegamos a ponte Internacional en Tui, ata hai poucos anos todo o tránsito entre Pontevedra a Portugal realizábase por aquí. A ponte, símbolo da modernidade, cando se inaugurou en 1886, foi construída por Pelayo Mancebo de Ágreda e non por Eiffel como moita xente pensa.

En Tui desembarcamos para saudar a nosa amiga Cris Rodríguez. Levamos catro horas navegando e un descanso non vén mal.

A partir de Tui, xa non afectan as mareas. A única forza que actúa é a corrente do río, pero superámola sen problema. Nunca pensaramos que fora tan pracenteiro vogar baixo un ballón, o malo é que non se poden tirar fotografías.

Despois de deixar atrás a Insua Grande atopámonos, á altura de Largo da Bouça, cuns fermosos petóns que provocan un estreitamento do río. A auga baixa con forza, cústanos superar a corrente. Dúas millas máis adiante, volvémonos atopar cunha forte corrente, tras varios intentos, o máximo que logramos, vogando con todas as nosas forzas, é neutralizala e quedar no mesmo sitio, resulta desesperante, e ao cabo dun tempo o río véncenos de novo. É imposíbel dar volta, navegamos para atrás ata alcanzar a beira, desembarcamos e arrastramos a piragua uns metros. Embarcamos de novo e catro horas despois de saír de Tui, sen que parase de chover, pasamos baixo a ponte que une Salvaterra con Monçao e seguimos río arriba algo máis de unha milla. Parécenos que aínda poderiamos seguir bastante máis, pero a luz xa baixou considerabelmente, vai caendo a tarde. Decidimos dar volta e deixar a piragua en Salvaterra para proseguir a expedición dentro de un par de días. Desembarcamos, no lugar de onde saía o transbordador, que a ponte fixo desaparecer, como todas os demais que había no río.

Ao cabo de cinco días volvemos e saímos de Salvaterra. O río baixa con moitísimo cadal, deberon abrir as comportas do encoro. Nada que ver co outro día, agás no que respecta á choiva. Costa moito avanzar e debemos ir buscando o lugar onde haxa menos corrente. Temos que ir moi pegados á beira portuguesa e en ocasións agatuñar polos xuncos e polos arbustos. Nin con esas, vólvese imposíbel avanzar e debemos dar volta cando non levamos recorridas nin dúas millas. Tiramos algunha foto pero, como non parou de chover, resulta complicado. O outro día, estragáronsenos moitas no último tramo. Volvemos falar do que resiste a cámara, se fose dixital hai tempo que tería perecido.

Advertisements

Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair /  Cambiar )

Google photo

Estás a comentar desde a túa conta de Google. Sair /  Cambiar )

Twitter picture

Estás a comentar desde a túa conta de Twitter. Sair /  Cambiar )

Facebook photo

Estás a comentar desde a túa conta de Facebook. Sair /  Cambiar )

Conectando a %s